एजेन्सी। बुकायो साकाको शानदार ह्याट्रिकको मद्दतमा इङ्ग्ल्यान्डले १० गोल भएको रोमाञ्चक खेलमा फ्रान्सलाई ६–४ ले पराजित गर्दै फिफा विश्वकप २०२६ को तेस्रो स्थान हासिल गरेको छ।

सेमिफाइनलमा अर्जेन्टिनासँग पराजित भएपछि तेस्रो स्थानका लागि मैदान उत्रिएको इङ्ग्ल्यान्डले पहिलो हाफमै आक्रामक खेल प्रदर्शन गर्दै ४–० को सहज अग्रता बनाएको थियो। खेलको तेस्रो मिनेटमा डेक्लान राइसले गोल गर्दै टोलीलाई अग्रता दिलाए भने १८औँ मिनेटमा एज्री कोन्साले अन्तर दोब्बर बनाए। त्यसपछि बुकायो साकाले ३७औँ मिनेट र पहिलो हाफको इन्जुरी समयमा लगातार दुई गोल गर्दै इङ्ग्ल्यान्डलाई बलियो अवस्थामा पुर्‍याए।

दोस्रो हाफमा फ्रान्सले उत्कृष्ट पुनरागमनको प्रयास गर्‍यो। किलियन एमबाप्पेले ४८औँ र ६६औँ मिनेटमा दुई गोल गरे भने ५४औँ मिनेटमा ब्राड्ली बारकोलाले गोल थपेपछि खेल प्रतिस्पर्धात्मक बनेको थियो। फ्रान्सले बराबरी गर्ने केही सुनौलो अवसर सिर्जना गरे पनि त्यसलाई सदुपयोग गर्न सकेन।

एमबाप्पेका दुई गोलसँगै उनले विश्वकपमा आफ्नो कुल गोल संख्या २२ पुर्‍याउँदै अर्जेन्टिनाका लियोनेल मेस्सीलाई पछि पारेर विश्वकप इतिहासकै सर्वाधिक गोलकर्ता बन्न सफल भए। उनले १० गोलसहित प्रतियोगिताको गोल्डेन बुट पनि जित्ने बलियो दाबेदारी प्रस्तुत गरेका छन्।

खेलको ८७औँ मिनेटमा जेड स्पेन्समाथि मालो गुस्टोले फाउल गरेपछि इङ्ग्ल्यान्डले पेनाल्टी पायो। उक्त अवसरलाई साकाले सदुपयोग गर्दै ह्याट्रिक पूरा गरे र टोलीलाई ५–३ को अग्रता दिलाए।

इन्जुरी समयको छैटौँ मिनेटमा उस्मान डेम्बेलेले फ्रान्सका लागि चौथो गोल फर्काए पनि त्यसको दुई मिनेटपछि जुड बेलिङ्घमले आकर्षक व्यक्तिगत गोल गर्दै इङ्ग्ल्यान्डको ६–४ को जित पक्का गरे। यो विश्वकपमा बेलिङ्घमको सातौँ गोल थियो, जुन एकै संस्करणको विश्वकपमा कुनै पनि इङ्ग्लिस खेलाडीले गरेको सर्वाधिक गोलको नयाँ कीर्तिमान बनेको छ।

यस जितसँगै इङ्ग्ल्यान्डले सन् १९६६ मा विश्वकप जितेपछि पहिलो पटक प्रतियोगितामा शीर्ष तीनभित्र स्थान बनाउन सफल भएको छ। साथै, विदेशी भूमिमा इङ्ग्ल्यान्डले विश्वकपमा हासिल गरेको यो अहिलेसम्मकै उत्कृष्ट नतिजा पनि हो।

१० गोल भएको यो खेलले विश्वकप इतिहासकै सबैभन्दा धेरै गोल भएको तेस्रो स्थानको खेलको नयाँ कीर्तिमानसमेत बनाएको छ। यसअघि सन् १९५८ मा फ्रान्सले पश्चिम जर्मनीलाई ६–३ ले पराजित गरेको खेलमा ९ गोल भएका थिए।